Агентлаг, төсөл хэрэгжүүлэгчийн бүртгэл

Агентлаг, төсөл хэрэгжүүлэгчээр ажиллахын тулд эхлээд хувийн данс үүсгээд, дараа нь бизнес данс нээнэ.

Бизнес данс нээх

1. Нэвтрээгүй бол дээд цэсний «Бизнес» → «Агентлаг» → «Агентлагаа нээх» (эсвэл «Төсөл хэрэгжүүлэгч» → «Үнэгүй эхлэх»). Хувийн данс үүсгэж, имэйлээ баталгаажуулмагц бизнес данс нээх хуудас руу шууд орно.
2. Нэвтэрсэн бол Хянах самбарын зүүн цэсний доод хэсгийн «Бизнес данс нээх», эсвэл профайл зургийн цэсний ижил нэртэй мөрийг дарна.
3. «Агентлаг» эсвэл «Төсөл хэрэгжүүлэгч»-ийг сонгоод нэрээ оруулж «Агентлаг нээх» (эсвэл «Төсөл хэрэгжүүлэгчийн данс нээх») товчийг дарна.
4. Хянах самбар нээгдэж «Эхлэх алхмууд» жагсаалт гарна: профайл, баталгаажуулалт, анхны зар (эсвэл төсөл), багаа урих.

Танд байгууллагаас урилга ирсэн бол тэр хуудасны дээд хэсэгт харагдана — «Нэгдэх» товчоор урилгаа хүлээн авна. Ижил төстэй нэртэй байгууллага бүртгэлтэй бол анхааруулга гарна: тэнд ажилладаг бол өөрийн данс бүү нээгээд урилга хүсээрэй.

Багаараа нэгдэх

Агентлаг эсвэл компанидаа ажилладаг бол өөрийн бизнес данс бүү нээгээрэй. Удирдлага тань урилгыг таны имэйл рүү илгээнэ; урилгаа зөвшөөрмөгц байгууллагын самбар нээгдэнэ. Танаас төлбөр гарахгүй.

Ганцаараа ажилладаг агент

Өөрийн нэр дээрээ нэг гишүүнтэй агентлаг нээнэ — дээрх алхмуудыг дагаад нэрийн оронд өөрийн нэрээ бичиж болно. Агентлаг үнэгүй: зар, гишүүн хязгааргүй. Урилгаар нэгдсэн ч, өөрөө агентлаг нээсэн ч таны профайл агентлагийнхаа нээлттэй хуудсанд багийн гишүүнээр харагдана.

Туршилтын хугацаа

Агентлаг туршилтгүй, эхнээс нь үнэгүй: зар, гишүүн хязгааргүй, карт, нэхэмжлэх шаардахгүй. Шинэ төсөл хэрэгжүүлэгч туршилтын хугацаанд Бүрэн багцын бүх боломжийг үнэгүй ашиглана; хугацааг «Үнэ» хуудаснаас харна. Төлбөрийн карт шаардахгүй. Үлдсэн хоног «Эхлэх алхмууд» болон «Тохиргоо» → «Багц ба төлбөр» хэсэгт харагдана.

Байгууллагаа удирдах

Гишүүд, урилга, олон нийтийн профайл зэргийг Хянах самбарын зүүн цэсний доод мөрөнд байгаа «Байгууллага» хуудасны «Гишүүд», «Олон нийтийн профайл», «Урилгууд» зэрэг табуудаас удирдана.

Нэг данс нэг байгууллагад харьяалагдана, тиймээс нэмэлт байгууллага үүсгэх боломжгүй. Байгууллагаа өөр хүнд шилжүүлэх, эсвэл бусад тохиолдолд хаах бол Тусламжийн хүсэлт илгээнэ үү. Байгууллага хаагдахад хамтын ажиллагаа дуусгавар болж, нээлттэй сонирхогчийн хүсэлт, үзлэг хаагдана. Хаагдсан байгууллагын удирдагч дахин байгууллага нээх, эсвэл зараа өөр агентлагт шилжүүлэх бол мөн Тусламжид хандана.

Өөрийн байгууллагаа хааж нэгдэх

Өөрөө байгууллага нээсэн ч дараа нь өөр байгууллагаас урилга ирвэл урилгын хуудсанд «Өөрийн байгууллагаа хааж нэгдэх» хэсэг гарна. Таны байгууллага ганц гишүүнтэй, төсөлгүй, нээлттэй захиалга, гэрээгүй, төлбөртэй багцгүй, төлөгдөөгүй нэхэмжлэх эсвэл идэвхтэй онцлох заргүй бол:

• байгууллага тань хаагдана (төсөл хэрэгжүүлэгчийн туршилт байсан бол дуусна);
• урьсан нь агентлаг бол зарууд тань тэнд ноорог болж шилжиж, танд хуваарилагдана (хүсэхгүй бол чагтыг авна); төсөл хэрэгжүүлэгч бол идэвхтэй зарууд татагдана;
• нээлттэй хамтын ажиллагаа, лавлагаа хаагдана.

«Ойлгосон»-ыг чагтлаад товчийг дарахад шинэ байгууллагадаа шууд нэгдэнэ. Дээрх нөхцөлийн аль нэг нь таарахгүй бол Тусламжид хандана уу.

Байгууллагаа баталгаажуулах

Байгууллагаа удирдах хэсгийн «Баталгаажуулалт» таб дээр байгууллагынхаа баталгаажуулалтыг илгээнэ.

Агентлаг:

1. Улсын бүртгэлийн дугаар болон СЗХ-ны тусгай зөвшөөрлийн дугаараа оруулна.
2. Улсын бүртгэлийн гэрчилгээ болон тусгай зөвшөөрлийн баримтаа тус тус хуулна.
3. Хоёр дугаар, хоёр баримт бүгд бөглөгдсөний дараа «Илгээх» товч идэвхжинэ.

Төсөл хэрэгжүүлэгч (СЗХ-ны тусгай зөвшөөрөл шаардахгүй):

1. Улсын бүртгэлийн дугаараа оруулна.
2. Улсын бүртгэлийн гэрчилгээгээ хуулна.
3. Дугаар, гэрчилгээ хоёулаа орсны дараа «Илгээх» товч идэвхжинэ.

Хүсэлтийг зөвхөн байгууллагын удирдлагын эрхтэй гишүүн илгээнэ. Илгээсний дараа хүсэлт «Хянагдаж байна» төлөвт орж, админ шалгах хүртэл хүлээнэ. Админ баталгаажуулсан эсвэл татгалзсан тохиолдолд танд мэдэгдэл ирнэ; баталгаажсан бол байгууллага албан ёсны оффисын дугаар (жишээ нь O-0001) авна, татгалзсан бол шалтгааныг мэдэгдэл дотор харна. Төсөл хэрэгжүүлэгч байгууллага баталгаажсан бол түүний төслийн хуудас болон төслийн картууд дээр «Баталгаажсан» тэмдэг харагдана. Татгалзсан хүсэлтийг мэдээллээ засаад дахин илгээж болно.

Баталгаажуулалтын хүсэлт илгээмэгц платформын админуудад мэдэгдэнэ; шийдвэр гармагц илгээсэн хэрэглэгчид самбар дотор болон имэйлээр мэдэгдэнэ, татгалзсан бол тайлбарын хамт.